Mat 18 | MHL | STEP | Iir nain Yeesus teeria-ke ekapep nokaremik, feenap, “Mua Maneka pika kemena-pa ikemik nain mua naareke miimow mua ikainon?”

Matthew 18

Mua naareke woos mua ikainon maemik

(Mak 9.33-37, Luk 9.46-48)

1 Iir nain Yeesus teeria-ke ekapep nokaremik, feenap, “Mua Maneka pika kemena-pa ikemik nain mua naareke miimow mua ikainon?” 2 Naeya takir gelemuta oko farep ekapeya gone-pa wiar iimarowap-puap 3 maek, “Yo makena nia maakiyem, ni kema me kirep takir gelemuta fain saarik me ikowen-na Mua Maneka pika kemena me wiar ekowen. 4 Ne sira feenap, o mua ona wame porop takir gelemuta fain saarik ikainon-na ikoka owow iinan-pa maneka ikainon. 5 Aria o mua efa kema suuwap takir gelemuta feenap nain saliwinon-na yo efa saliwiya nainen. 6 Ne takir gelemuta feenap nain yo opora opam-ikaeya pina onowa ofakoweya oro-booninon-na, mua nain iiriw nomon maneka imakuna-pa wiar kaikap ifer gone-pa wafuriwkin umekak-na eliw. 7 Miiwa fain sira samora unowa onimik nain-ke taanep ikua. Makena, sira nain naap imenarem-ikainon, ne wiisak, wi mua sira samora naap onowa wia mufimik nain ikoka pina maneka aawikuan.

8 Naapeya ni feenap oneka, niena wapen okaiwi-ki e meren okaiwi-ke sira samora-pa nia pikiwinok-na puukap wafureka. Ne merena e wapen okaiwi kuisow niar ikaeya kema kirep Mua Maneka opora wiar miimam-ikok umep o wameiya-pa eliwa ikowen. Nain eliwa, oko ni merena wapena erup erup ikaeya ni sira samora oni-ikim-ikok umiwkin os-ke mukuna anane ikaiya neeke nia wafurinon. 9 Ne sira naapiw mokoka-ke sira samora-pa nia pikiwinok-na mokoka nain pusunowap wafureka. Ne mokoka okaiwi kuisow ikok kema kirep Mua Maneka opora wiar miimam-ikok umep o wameiya-pa eliwa ikowen. Nain eliwa, oko ni mokoka erup niar ikaeya sira samora oni-ikim-ikok umiwkin os-ke mukuna anane ikaiya neeke nia wafurinon. 10 Naapeya ni maa urufami ikeka. Takir gelemutitik feenap nain wi oram-ke naep me wia samoreka. Yo nia maakiyem, wi ensel eena takir teeria feenap nain wia kakaltimik nain owow iinan yena Auwa wameiya-pa anane wiar ikaimik. [ 11 Yo Mua Muuka-ke wi mua mesenalep ikemik nain wia aawowa ekapem.]

12 Ne ni fain-ko kema suuweka. Mua oko sipsip andet kuisow wiar ikok kuisow wiar mesenalinon. Aria sipsip papako nain ema-pa wia wuap-puap kuisow mesenalek nain iwap me akupinon-i? 13 Yo makena nia maakiyem, ikiwep akupinon. Akup-ikiwep imeninon-na kemelinon. Ne sipsip papako eliw ikemik nain pun wia kemelinon, ne kuisow nain manek akena kemelinon. 14 Ne sira naapiw akena niena Niawi owow iinan-pa ikua nain mua takir kema saarik nain kuisow me mesenalinok naep maek.

Kema epaskun wuowa sira

15 Aria, nena teeria epaskun-ke sira samora nefa oninok-na o wiar ikiwep niisow muuta ikok opora nain kakeneka. Ne opora nefa miiminon-na ni niam erup kiiriw kema epaskun arowen. 16 Opora me nefa miiminon-na aria mua kuisow erup naap wia aaweya nefamiya ikiwuk. Ne wis-ke sira kamenap arep pina naap imenan nain opor onoma niar amisarep opora nain niar kakenuk. 17 Ne wis pun opora me wiar miiminok-na aria yo yookimik teeria wia fiirimep wi wapena-pa wiar wue. Ne wi opora maakiwkin emina kekan-afurap opora me miiminok-na aria sisina-pa wueka, wi owow oko mua ne wi takis aawow mua sisina-pa wia wuimik naap. 18 Yo makena nia maakiyem, ni unowiya niam fiirimep sira samora onimik nain wia kakenowen-na owow iinan-pa pina marew ikaikuan. Ne ni mua-ko sisina-pa wia wuowen-na aria wi owow iinan unum marew ikaikuan.

19 Aria yo kiiriw nia maakinen, mua niam erup kema kuisow wuap maa mauwa kookalep yena Auwa faremi nokarowen-na o eena owow iinan-pa ikaiya nain nia apekarinon. 20 Moram mua niam erup arow naap yo unuma-pa niam fiirimep ikok yo efa kema suuwowen-na yena ni niamiya ikainen.”

21 Ne aria Pita-ke iikirap ekami maek, “Maneka, yo yena teeria epaskun-ke sira samora efa onowa kamin areya yo kiripominen? Ikur okaiwi-pa erup naap-i?” 22 Ne Yeesus-ke maakek, “Naap weetak. Feenap, ten ikur okaiwi-pa erup, kiiriw nainiw tuunowa ikur okaiwi-pa erup (77) naap arinok. Sira samora naap nefa oni-ikiwinok. 23 Moram Mua Maneka pika kemena-pa ikowa nain fain saarik. Iir oko owow saria-ke ona uuwow mua wia farek, ekapep muuna efar wuamik nain kiripomuk naep.

24 Aria muuna kiripowa onoma wuami mokomokoka mua oko pekapemik. Mua nain iiriw muuna manek akena, maamuma ten milion naap wiar ikua. 25 Ne muuna kiripomowa me pepekeya owow saria-ke wia maakek, ‘Mua fain opap ona emeria muuka wiipa pun wia aawep ne wiena maa unow onaiya iiwawun wia sesekiwkin mua oko-ke sesenarep wia aawuk. Ne muuna nain weeserowinok.’ 26 Naap maeya mua nain-ke ona saria nain miir onoma-pa keema muuna mikap omawami maakek, ‘Aa, saria, yo efa kemale aa. Yo naap ikok muuna fain iiwawun welawinen!’ 27 Naeya saria nain-ke kemalep piipuap muuna nain pun wiar welawak. 28 Aria mua nain oromi ona uuwow epaskun oko urufak. Mua nain iiriw o muuna wiar arek, maamuma andet kuisow naap. Mua nain urufap imakuna opap farerekami maakek, ‘Yo muuna efar wuan nain aakisa kuisow kiripome.’ 29 Naap maakeya uuwow epaskun nain-ke miir onoma-pa keema muuna mikami maakek, ‘Aa, yo efa kemale aa! Ikoka muuna nain iiwawun kiripominen!’ 30 Naap maakek-na wia. Mua nain-ke opap pikiwemi anim onoma wia maakeya koora-pa wuamik, neek ikok muuna nain iiwawun welawap orainok naep.

31 Aria naap oneya uuwow mua papako-ke sira naap wiar urufap kema eliwa me ikemik. Naeya wiena saria wiar ikiwemi nain nanaromamik. 32 Ne saria nain-ke mua nain farep ekapeya amukaremi maakek, ‘No mua samora-ke! No iiriw yo efar omomeya muuna nain me nefar kema suuwowa nefar iirarem. 33 Nain nos-ke aakisa moram naep nena uuwow epaskun nain me kemalen, yo nefa kemalem naap?’ 34 Naap amukarep-puap wi anim onoma wapena-pa wiar wueya koora-pa wuamik. Neek ikok muuna nain iiwawun kiripomap orainok naep. 35 Aria yena Auwa owow iinan-pa ikua nain sira naapiw nia oninon. Niena teeria epaskun sira samora nia oniwkin-na niena kema-pa kiripowa maowen-na sira naap nia oninon.”